Bookish Scriber

  "Bakit ayaw pa ring magising ni bunso, kuya?" tanong ko sa sampung taong gulang kong kapatid. "Hindi ko alam, pero hintayin lang natin. Si Coco Martin nga, binaril kagabi pero nakapag-guest pa sa palabas kanina." Tumango na lamang ako habang nakatingin sa kapatid naming naliligo sa sariling dugo, matapos naming pakialaman ang baril ni tatay.

  Bumalik ulit ako sa nakaraan sa paraang hindi ko alam para iligtas ang isang babae. Tulad ng dati ay nahanap ko siya sa kanyang silid. Nakapatong sa isang maliit na silya at hawak ang isang tali. "Huwag! Please huwag mong gawin yan. " Tumingin siya sa kinaroroonan ko. Umiiyak, humagulgol. Kitang -kita sa kanyang mukha ang paghihirap. Tinangka ko siyang pigilan ngunit huli na ang lahat. Tumalon siya sa silya at ilang segundong nangisay bago tuluyang hindi na gumalaw. Nanghihina akong napaupo sa sahig. Sa ika sampung pagkakataon, hindi ko na naman nailigtas ang sarili ko.

  "Maghanap ka nga ng trabaho. Ang laki ng katawan hindi man lang naghahanap tapos manglilimos lang. Mga salot sa lipunan. Kaya hindi umuunlad ang Pilipinas!" Tiningnan ko ang lalaking aking hiningian ng kahit magkano lang para sa anak kong nakaratay sa ospital. Hindi ko makakalimutan ang kanyang mukha dahil siya ang nag interview sa akin kanina nang nag apply ako bilang janitor. Sinabi niya sa akin na hindi ako matatanggap dahil kahit elementarya ay hindi ako nakapagtapos. Siya ang nagsabing mas mabuti kung manglimos na lang daw ako sa daan.

Hindi ko alam kung ano ang dapat kong maramdaman habang nakatingin ako sayo na nakatayo sa harap ng altar. Ang gwapo mo sa suot mong tuxedo. Napangiti ka pa nang makita mong nakatingin ako sayo. Hindi ko maipaliwanag ang aking nararamdaman. Sa bawat hakbang palapit sa kinatatayuan mo ay mas lalong lumalakas ang tahip ng aking dibdib. Isa, dalawa, tatlong hakbang hanggang sa nasa harap na kita. "Alagaan mo mama ko. Sana mahalin mo siya at hindi iiwan tulad ng ginawa ni papa. Masaya ako para sa inyo." Hindi ko aakalain na imbes na ako ang bride ay ako yung maghahatid sa mama ko para ikasal sa lalaking nangakong ako lang hanggang sa huli.